اجدد الطرق لتعلم اللغة الأنكليزية بطلاقة و بوقت قصير ........!!!!!

السلام عليكم ورحمة الله وبركاته
من من بيننا ما بيتمني يتعلم الانجليزي بطلاقة ومين جتله فرصة وظيفه ملهاش حل بس اللغه الانجليزية كانت عائق لانهم طالبين انجليزي طليق او اكسلنت علي الاقل وطبعا معظمنا خد كورسات كتير وبرضه في النهاية بتلاقي نفسك مش بريفكت لا في النطق ولا في السرعه لاننا للاسف يا جماعة ضحية التعليم الحكومي الفاشل اللي كله معتمد علي التكست المكتوب من غير اي ممارسه وكله معتمد علي حفظ الجرامر والتلقين يعني بتكون جايب في الثانوية العامة مثلا 25 من 25 يعني المفروض كده انت ممتاز بس للاسف متعرفش تقول كلمتين علي بعض ولو سمعت حد بيتكلم متعرفش تلقط منه علي 3 او اربع كلمات مع انك جايب الدرجه النهائية وطبعا في الكليه (اقصد الكليات الغير متخخصة) بيكون الانجليزي مضيعة وقت وخلاص
المهم يا جماعة انا لا اريد اطول عليكم اكتر من كده انا اليوم جايبلكم طريقه جميله هتخليك تتعلم بسرعه وتحقق نتائج مذهله باذن الله في وقت قصير جدا بس هي عايزه شوية مصابره وتركيز وكمان جايبلكم كورس يعتبر من احسن الكورسات في العالم في تعليم الناتف انجلش

اولا الطريقه ودي خلاصه مجهود خبراء عالميين سنين كتير

1- لا تحفظ الكلمات(vocabulary) فرديه ولكن تعلمها في جمل

يعني لا تحفظ كلمه لوحدها لانك اكيد هتنساها لانها ليس لها رابط في عقلك سيبقى صعب جدا انك تفتكرها ولو افتكرتها مش هتجيلك وانت بتحاول تكون جمل وانا عندي طريقه يا جماعه ملهاش حل هتخليك تحفظ الكلمات ولا تنساها بسهوله وهي كالتالي :
اولا : كل يوم هتجيب نص انجليزي يعني مثلا خبر من موقع euro news او bbc او اي موقع اجنبي او مثلا جريده انجليزية من اللي بيتباعو عندنا زي اندبندنت مثلا وهتحاول تقرا الخبر ده وتفهمه كويس والكلمه اللي متعرفهاش هتجيبها من جوجل ترانسليت وممكن تترجم النص كله في جوجل ترانسليت [ندعوك للتسجيل في المنتدى أو التعريف بنفسك لمعاينة هذا الرابط] المهم تفهمه كويس وتعرف معاني كل الكلمات اللي فيه وبكده هتبقي عرفت الكلمات الجديده عن طريق التفكير والبحث مش الحفظ وهتكون ثبتت في مخك لانها مرتبطه بموضوع
ثانيا : العكس هتجيب نص عربي وهتحاول تترجمه انجليزي بنفس الطريقه انا عارف يا جماعه الموضوع هيبقي صعب في الاول بس هو عاوز صبر ولازم تكون مستمتع مش واخد الحكاية تحدي واجباري يعني لازم تحب الحاجه اللي بتعملها عشان تقدر تحقق تقدم

2- الاستماع الاستماع الاستماع :
يعني لازم كل يوم تسمع نصوص انجليزي وتحاول تركز وبقدر الامكان تفهم يعني مثلا ممكن تتابع قنوات الاخبار الانجليزيه زي CNN مثلا بس المهم انك تحاول تفهم انا عن نفسي برشح قناة MBC4 خصوصا برامج التوك شو زي برنامج اوبرا لانها برامج امريكيه اصلي وبيكون فيها الانجليزي الي حد ما مفهوم المهم تسمع كل يوم انجليزي

3- اجعل الانجليزي في اعماقك :
كلنا طبعا عارفين انجليزي الي حد ما كويس بس بتيجي عند تكوين الجمله وتلاقي نفسك مش عارف تجيب كلمتين علي بعض وتقعد تفكر عند كل كلمه (اه انا كنت فاكرها )مع انك عارف كل مكونات الجمله وحافظ كل كلماتها بس بتجيبها ببطئ انما لو شوفت نفس الجمله بس بالانجليزي هتلاقي نفسك عارف معناها وتقول امال انا مش عارف اكونها ليه وبتكون المشكله مش انك مش عارف انجليزي او مش عارف كلمات او جرامر
لكن المشكله هي ان مخك متبرمج علي العربي لان اللغة الام في مخك هي العربي بالظبط زي القاموس الانجيزي عربي والعربي انجليزي وانا يا جماعه هقدملكم طريقه عبقرية وهتحس انك بتتحسن كل يوم عن التاني وهي ازاي تخلي مخك انجليزي عربي ببساطه يا جماعة الطريقه هي انك فعلا هتقلب مخك وهتخلي لغة تفكيرك انجليزي طبعا في ناس هتستغرب ازاي يعني ببساطه يا جماعه الطريقه انك هتخلي مخك جاهز يعبر بالانجليزي زي العربي تماما يعني مثلا انت رايح تنام متقلش لنفسك (انا هقوم انام بقه دلوقتي)انما قول ( i am going to sleep right now) او افتكر موضوع معين ونقشه مع نفسك بالانجليزي وهكذا بس تلغي العربي يعني متقعدش تترجم انت هتعتبر نفسك لغتك الاساسية هي الانجليزي ولو ملقتش نفسك عارف معني كلمه او جمله او تعبير ربنا يخليلنا الجوجل ترانسليت والكلمات دي هتثبت في مخك وهتبقي ريدي للاستخدام في اي وقت لان عملت اعداد لمخك انه يكون جاهز يعبر بالانجليزي وهتلاقي نفسك بتفتكر كلمات انجليزي ماستخدمتهاش من اولي اعدادي وحاول تستخدم الماتيريال الحقيقي الاميركي ودا ان شاء الله موجود في الكورس

- اما بالنسبه للنطق ودا برضه مهم جدا لان في كلمات كتير جدا بننطقها غلط انا هديلكم موقع نطق رائع بينطق صح بصوت بشري بينطق نصوص لحد 3 سطور علي بعض هتحط النص هتختار الصوت واحسن صوت واحد mike او كريستين وهتضغط speak وبعدين هو هيعمل دونلود للنص علي جهازك mp3


[ندعوك للتسجيل في المنتدى أو التعريف بنفسك لمعاينة هذا الرابط]



4- اجب علي اسئله بالانجليزي :
والطريقه دي حققت نجاح كبير برضه مع ناس كتيروهي انك تسمع قصه وحد يسالك اسئله بسيطه منها وانت تجاوب متقلقوش لان دا برضه في الكورس
واليكم الكورس وهو اسمه (learn real English conversation) وهو كورس رائع يا جماعه بيتكون من محادثات انجليزية حقيقية مسموعه ومقروءه ومعاها شرح مسموع ومقروء للمعاني الايديومز اللي في المحادثه هو كل درس عباره عن 3 حاجات المحادثه وشرح المحادثه والقصه اللي عليها اسئله باسئلتها البسيطه جدا:



حصريا لمنتديات وادي الذئاب


(سبحان الله وبحمده ... سبحان الله العظيم )
( مَن استغفر للمؤمنين والمؤمنات كتب له بكل مؤمن حسنة )